生命中必經之痛

 有些痛是生命/成長必經之痛。生命是在疼痛中誕生，肌肉是在撕裂中成長，人是在錯誤中學習，有什麼改變是不需經歷痛苦的嗎？

今日係醫院見左一個媽媽，佢一路見醫生，一路眼淚水就一滴滴咁滲出黎，我就知道佢咁多年黎一定受左好多苦。佢本身患有長期病患，然後有兩個資優仔仔。媽媽一路都係呢個家庭既照顧者，由當初照顧先生，去到先生發生左意外之後照顧仔仔，再到而家仔仔大喇，三十而立喇，佢都仲係一個照顧者既角色。可惜既係，正正因為佢仍然係一個照顧者，佢自己，同兩位仔仔都面對唔同既情緒問題。

生命本身係必須經歷痛苦，然而，作為父母（特別係母親），好多時都唔想子女受苦，怕佢辛苦，怕佢痛，希望子女唔需要經歷痛苦可以平步青雲。世上邊有咁大隻蛤乸隨街跳，當生命迴避左既路，佢總有一日要行返，如果堅持迴避，就會成為生命中既問題。

兩個仔仔，一個成為左自我中心既依賴型性格，所有事情都係以自己為中心，媽媽做既任何事都要遷就佢，而佢又唔會遷就媽媽。另一個就成為左要強，好勝，對自己要求極高，然而當要做重大決定時就將個責任放係媽媽度，怪媽媽強逼佢，好容易指責媽媽，但係關係上卻因為搬離左媽媽而比較好。

兩個仔仔，各有各困難，而眼前既媽媽係度訴說自己生命之苦既時候，我心入面同時思考緊佢作為母親既困難。作為一位單親媽媽，盡可能將最好既都俾仔仔，當下好難分身思考點幫助佢地發展，因為只係基本既管教同照顧已經耗盡左佢既精力同時間。加上媽媽自己同丈夫都係專業人士，佢地對自己既要求都高，於是乎仔仔都好自然地學習左同樣既高要求，高標準，去到要落地實踐時，高要求高標準＋缺乏時間缺乏指導就會變左「眼高手低」，營造左好大既張力。而當中未處理同疏導既張力就形成情緒，情緒窒礙左溝通，家庭中成員就出現不同既成長問題。

黎到呢步，家庭咁大個問題我地冇辦法一次過解決，但我地可以讓媽媽企返穩個人先，然後一步步做返適合自己既決定。當媽媽企返穩既時間，劃返合理既界線同要求，仔仔就自然會面對返自己既人生課題。當人唔去逃避時，生命就會向佢需要既地方生長。

習慣的養成

 有人話習慣需要21日黎建立，但係我買左隻錶明明唔夠一個星期，竟然已經建立左新習慣(Tap tap兩下黎睇錶)。

最近除左錶之外都建立左一個新習慣，對於關係既不安同擔心。呢個習慣係同我學催眠治療既老師有關，其中一位老師佢好錫我（有段時間），用佢既形式黎錫我，佢會表現到好熱情，好想將佢既喜愛Share俾你，好外向，好多野講，包括講自己既野同講伴侶既野。

但係呢，當我想講我自己既部份時，佢好快就冇耐性去聽，好快就俾好多意見，好快就覺得佢個套好啲。咁都係既，佢既人生閱歷比我長，比我多，例如佢會覺得某啲工作係個好選擇（which佢自己都冇揀到），但其實我只係想呻下，同埋都會想睇下有冇其他生活既可能性。

而最近呢次係，當佢嘗試撮合我同另外一個同學，而我地係一齊左啊，但係相處有磨擦，有唔夾，有大家分別執住自己既事情，抑都有分分合合既時候，原來佢又會係背後講。而講既說話都幾難聽。

當一啲難聽既說話，係隔左一重你聽返返黎之後，原來個份既傷害係比想像中深遠，又或者咁講，原來我都幾重視佢點樣睇我，一段維繫左十幾年既關係。

黎到而家，有時都會諗下人地係點睇自己，呢個都係一個新既習慣。新舊習慣會互換，好習慣如是，壞習慣如是，所以呢～我而家都係換返隻舊錶先。Goodnight